بیزیم دونیامیزدا تفکر، دویون­لری آچماغین مطلق قدرتی دگیل گرک بویولو گئدیب و اوناچاتماغینان کامیل اولا.

بویولدا گرک بیز فکریمیزی ایشه سالاق آیری بیر عبارتده نه قده­ر فکر اتمیشیق و او دسته فیکرلردن کی منطقی اولوبلار عمل و اجرا مرحله سینه داخل اولاق و تزه ایش یول­لارین آچاق.

بو قسمتده گرک تمیز اولماغی و ایشه باشلاماغی اوزوموزدن باشلییاق و اگر دوز فکریمیز اولسا بو نتیجه الیمیزه گله­ر. اوناجان کی اوزوموزو اصلاح ائتمه ساق چوخ مشکل اولارکی اصلاح لاری خانواده میزده و آیریلاردا وجوده گتیرک. اخلاق، رفتار و کردارلارین اصلاحینا گره­ک اوچ اصلی نظرده آلاق: یاخچی فکر، یاخچی دانیشیق و یاخجی ایش.

چون بیزیم فکریمیز و منطقیمیز یاخچی اولسا اوز اوزونه بیزیم سوزوموزده یاخچی اولار و اوزمان کی سوزوموز یاخچی اولسا حتماً یاخچی ایشه طرفه گئده­ریک اونا خاطیر اصلاح لاری باشلاماقا و ارزش­لره طرف حرکتی یاخچیدیرکی او پله­لری نظرده آلاق کی بیزاوچون اصلی مرحله اولوبلار و اووقته کی بو پله­لری عملاً آدلامامیشیق چتین­دیرکی بوتون نتیجه­نی آلاق و آیدین لاشاق.

البته دئمه­لیق کی بوپله­لری قادر اولماریق بیرگونده باشا ووراق بلکه یاخچیدیرکی زمانینان انجام وئره­ک ولی بیر کیچیک قدمده گوتورسه­ک گئنه بیزی هدفیمیزه یاخینلادیر ایندی خلاصه کیمی بو موضوعونو آچیریق:

1- ارزش­دن اوزاق اولان لاردان قائیتماق:

انسانین روحی و فکری چون معمولاً پاک و تمیز اولار وقتی کی ارزش­لردن اوزاق ایش­لره قاریشا اوُزون ایتیره­ر و بو ضد ارزش­لرعمومی اولار و بو فقط مواد مخدره مربوط دگیل. گرک ارزش­لردن اوزاق ایش­لردن اوزوموز کناره آتاق و پرهیز الییاق بوردابیز ایستیریق نئچه­ایشی بیر یرده انجام وئره­ک و یاشائیشین بوتون مرحله­لرینه هماهنگ اولاق.

2- خودداری (گُوزله­مک)

اوایش­لردن اوزاق گزمک­کی اولارین یاخچی و پیسی بیز اوچون شک یارادیر. بیر مثال بو کی بیلمیریق بیر یئرده­کی مخدر چکیلیر و دوستوموزون بیری اوردادیر آیا او یئره گئده­ک یا کی یوخ؟ بووقتده چون او ایشین یاخچی و پیسین بیلمیریک گره­ک اویئره گئتمه­دن آیاق ساخلییاق.

3- قناعت:

یاخچیدیرکی مریض لیق زمانی و درمان مرحله­سینده مخصوصاً اول سفرده و سوراکی سفرلرده حداقل امکاناتا قانع اولاق. بوقسمتده گرک اله شرایط قاباغا گلمه­سین کی بیز آخیره قده­ر گدالیق الییاق. بیزگرک گله جک اوچون اوز مالی امکان لاریمیزی چوخ قوی و محکم نظرده آلاق آنجاق  دوز یولونان.

مهم نکته­ده بودورکی او آز امکان­لاریکی الیمیزده وار اولاردان لاپ چوخ استفاده الییاق و همیشه او امکان لارکی واریمیزدیر اونلارین قدرین بیله­ک و ایشیمیز او اولماسین­کی صبحیدن آخشاماجان اولارین حسرتینده اولاق­کی یوخوموزدور. انسانا قالان اودورکی اونو فکری و دوشونجه­سی اوچون توپلایئبدیر.

4- صبر (دایانماق)

بیز گره­ک هدفیمیزه چاتماقا و یا کی درماندان و مخدردن اوزاق اولماق و قورتارماق اوچون گرک صبر الییاق و حتی صبر ائتمده بی صبر اولمویاق چون بیزیم فکریمیزین بوتون ایش­لری عمل و صبرینه­ن نتیجه تاپار. اگر بیز بوغدا اکیریق اوکی تئز و بیر هفته­نین ایچینده محصول وئرمز تااونو بیچاق بلکه اونو گوزلمک و وقتینده سو وئرمگینه­ن الییه بیل­لیک محصولوموزو گوتوره­ک.

اعتیاد مسئله­سینده و مریض لیقینده صبرائتمک صادقدیر یعنی بیز ذره ذره اوز سلامت اولماغیمیزا یاخینلاشیریق و او یول لاردان بیریکی بیزیم دویونوموزو آچار (زمان مسئله سیدیر) اوناخاطیر بیزیم صبریمیز اولمالیدیر و اودا یاخچلیق صبری.

5- وکیل:

مختلف مرحله­لرده کی بیزیم سفریمیز وار و بوتون قوتینه­ن کی چالیشیریق یاخچیدیرکی یوخاریداکی قوه­نی اوزوموزه وکیل الییاق و همیشه اونون محبتینه و کرمینه باغلی اولاق و اونون کمک لیقین هر ایشین باشی نظرده الاق تا او بیزه هدایت و کمک له­سین و یاددان چیخماسین کی همیشه اونو سسلییاق تا او بیزه چوخ کمک اله سین و جواب وئرسین.

6- رضا :

یاخچیدیرکی بیز اوره­کده و دیلده بیزاوچون یازیلان تقدیر و قسمتی قبول ائدیب و آللاه طرفیندن یازیلانا راضی اولاق و همیشه فکر و عقلینه­ن و عملینه­ن تزه یاخچی ایش­لری باشلییاق.

چون اوکی بیزی دوز هدفه ساری چاغیرار و دستور وئره­ر او ایش لردیرکی ارزش­لرین یولوندا تفکر و عقلینه­ن یارانیر.

7- تسلیم:

بو مرحله حتی رضا مرحله­سنیدن یوخاریدیر و اله گلمز مگر اولاراکی کئچمیش مرحله­لری آدلاسین­لار و یقین درجه­سینین لاپ یوخاری مرتبه سینه قدم قویسونلار.

(رضا) مرتبه­سینده (آللاه) هر نه­یی قرار وئرسه بیزیم ایستک­لریمیزین اوزودور و اونا راضی اولمالییق آنجاق تسلیم مرتبه سینده داها بیز لیک ایش یوخدور فقط هرنه وار آللاهین قدرتیدیر و اونا خاطیر هئچ بیرایشمیز اوقدرتین قاباغیندا اولابیلمز. دئمه­لییک بوزماندا تسلیم مرحله­سین قبول ائتمک و اجراسیندا اولماق چوخ چوخ چتیندیر. بیز ایندیدن فقط تسلیم مرتبه­سینه­ن تانیش اولوروق و چالیشیریق اونو یاواش یاواش تانییاق آمما بو مرتبه­نین عمله گلمه­سی اون دوردونجو قانونون و اوچونجو سفرین آخیریندا یعنی انسانین آللاها چاتماق مقامیندا باش توتار.

هر بیر حالدا بیز بئشینجی قانوندا گره­ک اوز فکری ایش لریمیزی عمل اوچون و ایشه دوشمک اوچون یولا سالاق.

                                                                                           همسفر مريم

                                                                                               بهار 90